Pen Tool ഫോട്ടോഷോപ്പിൽ ഒഴിച്ചുകൂടാനാവാത്ത ഒരു ടൂൾ ആണെന്നതിൽ ആർക്കും തർക്കമുണ്ടാകുമെന്നു തോന്നുന്നില്ല. എന്നാൽ അതിന്റെ ഉപയോഗത്തിനു മൗസ് വഴക്കം അത്യാവശ്യമാണ്.
ചിത്രം ശ്രദ്ധിക്കുക, ഇതിൽ ആദ്യത്തേത് പെൻടൂൾ. തൊട്ടുതാഴെകാണുന്ന Freeform Pen Tool നമുക്ക് ചുമ്മാ വരഞ്ഞ് പോകാനുള്ളതാണ്. പിന്നീട് വരഞ്ഞതിനെ കറക്റ്റ്, ക്ലിയർ ചെയ്യുന്നതിനായി അതിനു താഴെയുള്ള Add Anchor Point Tool ഉപയോഗിക്കാം. അതിനായി പൂർത്തിയാക്കിയ ലൈനിൽ എവിടെങ്കിലും കണ്ണിച്ചോരയില്ലാണ്ട് എടുത്ത് പ്രയോഗിച്ചാൽ മതി. അതിനു താഴെയുള്ള Delete Anchor Point Tool ആവശ്യമില്ലാത്ത Anchor Point ഡോട്ടുകൾ ഒഴിവാക്കാൻ വേണ്ടിയുള്ളതാണ്. അതുവഴിനമുക്ക് കൂടുതൽ മെച്ചപ്പെട്ട എഡിറ്റിംഗ് സാധ്യമാകുന്നു. പിന്നീട് വരുന്ന Convert Point Tool നമുക്ക് ആങ്കർ പോഇന്റ് വെച്ച് കൂടുതൽ ഭാഗങ്ങളിലേക്ക് തിരിക്കാനും മറ്റുമുള്ള സൗകര്യം തരുന്നു. ഇതിനാൽതന്നെ വളരെ ഭംഗിയിൽ ചിത്രങ്ങൾ വരക്കാൻ ഏറ്റവും നല്ല ഒരു മാർഗമാണൂ പെൻടൂൾ എന്നു പറയാം.
ഇനി എങ്ങനെയാണൂ പെൻ ടൂൾ പ്രയോഗിക്കുന്നതെന്നു നോക്കു. നമുക്ക് ആവശ്യമായ സ്ഥലത്ത് നിന്ന് ക്ലിക്ക് ചെയ്ത് അടുത്ത ക്ലിക്ക് ലേക്കെത്തുമ്പോൾ അവിടെ ഒരു ലൈൻ പ്രത്യക്ഷപ്പെടുന്നു. ആ ക്ലിക്ക് വിടാതെ തന്നെ നമുക്ക് ആ ലൈനിനെ നമ്മൾ ആഗ്രഹിക്കുന്ന തരത്തിൽ വളച്ചെടുക്കാം. അതിനു ശേഷം അടുത്ത ക്ലിക്കിലേക്കു നീങ്ങാം. ആങ്കർ പോയിന്റ് ഡോട്ടിനു ഒപ്പം കാണുന്ന നീണ്ട ലൈനുകൾ നമുക്ക് ഈ വരകളെ മറ്റേതു ഭാഗത്തേക്കും തിരിക്കാനും വളക്കാനുമെല്ലാം ഈസിയാക്കിത്തരുന്നു.
പെൻ ടൂൾ ഉപയോഗിക്കുമ്പോൾ പ്രധാനമായും തുടക്കക്കാരെ അലട്ടാറുല്ല ഒരു പ്രശ്നം നമ്മൾ വരച്ച് റെഡിയാക്കിയ ഒരു ലൈനിനു ശേഷം അടുത്ത ലൈൻ വരക്കുമ്പോൾ അതു മുൻപ് വരച്ചതിനോട് അനുപാതികമായിതന്നെ വരുന്നു, അതുവഴി നാം ഉദ്ദേഷിച്ച ലൈനല്ല കിട്ടുക എന്നതാണ്. അപ്പോൾ പിന്നെ എന്തു ചെയ്യും. ആദ്യവരക്കു ശേഷം Alt കീ പ്രസ്സ് ചെയ്താൽ പിന്നീട് വരക്കുന്ന വര മുൻപ് നമ്മൾ വരച്ച ലൈനിന്റെ തുടർച്ചയായിത്തന്നെ എന്നാൽ പുതിയ ഒരു ലൈനായി നമുക്ക് വരക്കുവാൻ സാധിക്കും. അതിനാൽതന്നെ നമുക്ക് ചിത്രങ്ങൾ വരക്കുന്നതിനു അതുവളരെ സഹായകമാവും.
Pen Tool ഉപയോഗിച്ച് വരച്ചുവന്ന ഭാഗത്ത് നമുക്കൊരു ഒരു പോയിന്റ് ആഡ് ചെയ്യണമെങ്കിൽ Add Anchor Point ടൂൾ എടുത്തോ അല്ലെങ്കിൽ വേണ്ട ഭാഗത്ത് ഒന്നു മൗസ് ഉപയോഗിച്ച് ക്ലിക്കുകയോ ചെയ്താൽ മതിയാകും.
ഇനി നമുക്ക് വരക്കുന്ന പാത്തിനുള്ളിൽ കളർ ഫിൽ ചെയ്യണമെന്നുണ്ടെങ്കിൽ ചിത്രത്തിൽ മാർക്ക് ചെയ്തിരിക്കുന്ന Shape Layers സെലെൿറ്റ് ചെയ്താൽ മതിയാവും.
ഇനി മറ്റൊന്ന് നമ്മൾ പൂർത്തിയാക്കിയ പാത്ത് സെലക്ഷനിൽ പെൻടൂൾ വെച്ച് റൈറ്റ് ക്ലിക്ക് ചെയ്യുമ്പോൾ വരുന്ന മെനുവിൽ Stroke Path സെലെൿറ്റ് ചെയ്യുക. Stroke Path വിന്റോയിൽ താഴെക്കുള്ള ആരോ ക്ലിക്ക് ചെയ്താൽ വിവിധ ഫിൽ ടൂളുകൾ നമുക്ക് കിട്ടും. അതു നമ്മുടെ ആവശ്യം പോലെ ഉപയോഗിക്കാം.
ഇനി Make selection എന്ന ഒപ്ഷൻ ആണു ഉപയോഗിക്കുന്നതെങ്കിൽ അതുപയോഗിച്ച് നമുക്ക് ചിത്രങ്ങൾ കട്ട് ചെയ്തെടുക്കാനും ഗ്രേഡിയന്റ്, ബ്രഷ് മറ്റും ഉപയോഗിക്കാനും സാധിക്കുന്നു.
കുറേയൊക്കെ ഇവിടെ എഴുതി, ബാക്കി സംശയങ്ങൾ ചോദിക്കൂ, തീർച്ചയായും അറിയുന്നത് പങ്കുവെക്കാം.
